Aŋu abɛ Ngwo a klada ngɛ

Aŋu abɛ Ngwo a klada ngɛ
.  . . Bɔ Ngwo mane abɔ tsɛrɛ byɛ e ma ga atso' yɛ a ma ke ko'ko’ ne atso’o Ngwo ngɛ a  ze'e a Widikum  afwɔ a ma zɔ'rɔ kpe Tadkɔn. Ekumu abɛ Ngwo a ze'e ene ekumu  ŋwɔ mbembe etɛ sam bɔ Nkwedi mane eye mɔ Ekpabyɛ. Aŋu angɔ nyii abɛ Ngwo nyɛrɛ ze'e  Andek Ngie me fɔɔ anji Mbe ngɛ, angɔ be bwɔanɔm tɛd, Ngwo, Etse mane Afli.
. . .  Ekumu wɛ kpe Ngwaw ngɛ a ne ekumu ene entiri ebɛ gimkpa' efwɔ Njikwa. Afwɔ kɛ shi mwɔ abɛ Ngwo e ma zɔ'rɔ kpe na etaa abɛ. Abɛ zɔnɔ a ne le ndɔ mpara a ntɔ' a Sabli , a ma ala kamakam yɛ a ma buumu bɔ afwɔbi, bwɛrɛ ene aghɛ' yɛ bɔ gimkpa' a fwe e ga etso' ŋwa' ngɛ ma atso' Ngwo azhu' ekobo de' me tsɛ' anyi bo.Endzobo chɛ bɔ fan a ze'e ngɛ, e le egɛbɛ nyii abwe angɔ. Afwɔ zɔnɔ ye fɔɔ anglɔ ene atso' mbɔ'nga Ehla shi buumu me le mpe etso' tsɛrɛ. E we nara e nɛɛ kpe bɔ Hla ba ga kpe mbɔɔ ke me mwɔ enji Ngwaw bo. Akumu zɔnɔ; Nguni, Minguhni, Ngunu mane Engwini na Ebwa ŋwa' aŋu ebɛ ebara ma zɔ'rɔ ngɛ ka aŋu bɔ fan a bɔɔ a ŋwɛ'rɛ aŋu a ne ma zɔ'rɔ ene nchwɔ bo ngɛ.Ebɛ ebara de' a da ba bli a gli akumu zɔnɔ e zɔ'rɔ Ngwo anyi, ka de mwɔ aŋu abɔ Ngwo de' ma kede na endwa'a nɔ. Enji ene ekumu wunɔ kpe Njikwa nɔ ne ga kpe aghɛ' e ma ngɔɔ ekwa ene atso'o Ngwo mbɔ'nga abɔ byɛ e ma tsɔmɔ aŋu ngɛ na akiri asɔmɔ.